Recent Comments
Mr WordPress on Hello world!
Ang Kaibahan
Ang Kaibahan
20 Mayo 2013
Natagpuan ko na
ang unang patak ng ulan
ang alimpuyo ng katawang – laman
ang daluyong ng kahapong nagdaan
ang sigaw ng pusong sugatan
ang mga tula ng kamalian
ang opinyon ng kabuktutan
ang kawalan ng karangalan
Ibinababa ko na
sa iyong paanan
ang lahat ng aking nakaraan
ang lahat ng aking kahangalan
ang lahat ng aking kamangmangan
ang pira-pirasong katauhan
ang pagkataong lublob sa kasalanan
Napagtanto ko na
ang lahat ng ito’y iyong nalalaman
bawat sandali’y ako’y iyong minamasdan
kilos ko’y iyong sinusubaybayan
hinihintay na tuluyang mapunta sa kawalan
(upang ako ay iyong mapuntahan)
Natagpuan at napagtanto ko na
Ikaw lang pala ang kasagutan
sa aking mga tinatakbuhan
ikaw lang pala ang katotohanan
sa realidad ng kalupitan
Ikaw lang pala ang tunay na pag-ibig
sa tibukin ng pusong hangad
Ikaw lang pala ang kasiyahan
sa katahimikan ng kalungkutan
Ikaw lang pala ang kailangan
sa’king malaking kakulangan
Ikaw lang pala ang karunungan
upang makita ang ilaw sa daan
Ikaw lang pala ang paraan
upang katauha’y mahugasan
Kulang yaring taludturan
upang kilalanin ang iyong pangalan
pasalamatan ang iyong kapatawaran
suklian ang iyong pagmamahal
isigaw at habambuhay na ika’y papurihan
ngunit nawa iyong tanggapin
ang aking kababaan
ang aking mga karumihang
idinudulog sa’yong paanan
(Panginoon, mahaba pa ang aking landasin
Samahan mo ako sa aking tahakin
Pag-iisip ko’y patagin, puso ko’y biyakin
Isakatuparan mo sa akin ang iyong layunin.)
Posted in Uncategorized
Leave a comment
Sa Puso Mo Ang Simula
Sa puso mo ang simula
19 Mayo 2013
Nais kong sumulat ng tula (ng pag-ibig)
dahil ibinigay mo ang tinta;
binuhay mo muli sa’kin ang haraya,
sa’yong mundo na ang Katotohanan ay tunay na mukha.
Ang iyong pag-ibig ang nagpasulat
sa akin upang tumula:
imahe mo ang naging talinhaga;
simbolismo mo’y naging tugma;
ang Salita mo ang nagpaunawa.
Pag-ibig ang sinulat kong tula
dahil ‘di ko mahagilap ang salita
sa Kapangyarihan mong kay hiwaga.
O, Ikaw ang buhay sa aking tula
Kaya sa puso mo ako magsisimula.
Posted in Uncategorized
Leave a comment
ako ang sagot
may lugar ba
ang kawalan?
(at)
may tunog ba
ang katahimikan?
ngayon ay sandali ng katanungan
bakit ko ako pinahihirapan?
Posted in Uncategorized
Leave a comment
katahimikan at kawalan
binibikig mo ang aking tinig
habang binibigkis mo ang aking dibdib
umaapaw Panginoon ang aking puso
dahil sa aking luha at Iyong Pag-ibig
Posted in Uncategorized
Leave a comment
wideeyedtarsier 